Sunday, November 07, 2010

Piyek 2: Isuna Met! (November 7, 2010)

Na-irwamakon nga agbibyahe. Manipud idi nakapuutak, pasaray mapan kami agpasyar idi idjay Villa Garcia. Sabali nga ili ti nakaiyanakak ken dimmakelak. Napalalo ti rag-ragsak ko nu adda kam ijay ta adu ti makaay-ayam ko, saan nga kasla idjay ili mi, manmano ti padak nga ubbing. Apagsangpet mi pay laeng mangrugin ti kin-namatan. Saan kami mabannog nga agtataray ngem no dumanon tay oras ti pang-ngaldaw umay da kamin tun sapulen daydi inang mi nga baket. Paturugen dakam tun malpas kam nga mangan, “Tapno alisto nga dumakkel!” kunana. Bantayan da kami ah daydi inang mi, “Agingga nga saan a makaturog, saan nga mabalin ti rumwar!” Intun malem nga makariing kamin, rugyan min tu manen ti agay-ayam uray no saan kampay nga nakamur-muray.

Agpapukis pay gayam ti maysa nga ranta mi nu mapan kam ijay Villa Garcia, dijay maysa nga ankel mi ti para pukis mi. Kayat ko idi ti pukis na ni ankel ta karusen na nga pirmi ti buok mi, mangibati la bassit idjay tuktok, highcut! Isu na laeng ta medyo nasani-it idjay banda na nga makarusan aglalu nu nangudel tay labahas na.

Idjay ili mi, as-asideg ti riknak kadagidjay duwa nga apong ko nga babaket. “Mama” ti tawag ko kadakuwada. Manipud kina-ubing ko isu dan ti kaka-iddak iti rabii. Nai-ruwamakon idjay angot da saanak nga makaturog no saan ko nga kaidda ti maysa kaniada. Isu nga nagbati ak idjay ili da mamang ko uray kayat dak nga ikuyog idi immakar da idiay Sta. Cruz. Idjay dan nga nag-naed.

Nu domingo idi kanayon dak nga itugot idiay ili. Kalpasan ti misa agdiretso kam idjay tiendaan, maipagatang ko manen tay kayat ko nga makan wenno abal-balay ken makaluganak manen ti karitela! (ta manmano pay ti traysikel idi). Agtarayak tun nga mapan lumugan ijay sango abay ti kutsero, uray no agunget da ipapilit ko latta, kayatko idjay tapno makitak amin nga malabasan mi.

Idjayak kanu Pattuko nga agiskwelan. Sakbay ti panagse-serrek, immay nak sinundo ni tatang ko. marigatanak idi damdamo, awan am-ammuk ngem di bumaybayag gagay-yem ko amin idan. Idiay ko nga nakita datay first crush nga kunada. Manmanu nga makitak isuna idiay nga agay-ayam. Makitak laeng isuna no lumabasak iti asideg ti balay da ken maranaak latta idiay ruwar nga agbum-bumba idjay gripo da. Manipud idin ket tunggal lumabasak idiay batug da tumalyawak latta idiay ayan ti gripo ta bareng nu adda isu na idjay.

Dili. Byahe manen ta idjayak kanu nga agbasa ti hayskul. Di damdamu makapanerbyos aglalu nu mapan ka idiay sango “to introduce yourself”. Kaadwan na nga ka-eskwelak dagidiay met la kaklasek idjay Caparia-an. Nu malpas ti eskwela ti malem, awanen ti ay-ayam ken tinnarayan.

Maysa nga malem agtudtudo, idi magmagnaak nga agawid nakitak isuna idjay siruk ti balay didjay kaaruba da nga agkam-kamat ti piyek. Tilewen na kuma ngata ngem haan na matiliw. Nagtakderak idjay ken buy-buyaek isuna agingga nga nadlawnak. Dinamagko, “mano ti piyek na?” Duwa kano. Ken tinulungak isuna nga nangtiliw. Idi naiyawat ko jay maikadwa nga piyek, pimmanawakun. Mabainak sa idi.

Napanak idjay Manila malpas ti hayskul. Trabaho ti bigat, eskwela ti rabii. Nakitak manun isuna idjay Recto Ave. “Uy! Sika gayam!” nakunak laeng idi. Isun ti naudi nga panagkita mi.
<photo id="1" />